ف الاجمال اللقاء كان حلو، انما كل واحد قال كلمته ومتعرفش الكلام هيروح فين ولا هيحصل إيه ؟
المهم قابلت زمايل واصدقاء وحبايب كتير، ودي اهم حاجة ف الموضوع ودي كلمتي مكتوبة:
الهوية, أو الحوية, زي جدرها اللغوي المصري القديم “حوا”!
- الهوية, يعني ملامح الشخصية, بالظبط زي وظيفة الـ “حوا” القديمة!
قوة أو ضعف الهوية, بتبين قوة أو ضعف مشاعر الولاء والإنتماء, كمان قوة أو ضعف الهوية بتحدد قوة أو ضعف النسيج الإجتماعي!
- الهوية طبقات متوازية ومتعايشة, مش متقاطعة ولا متخاصمة, منها الوطني والجغرافي والعرقي والديني والمهني والرياضي والشخصي .. لخ!
الهويات الدينية كتير, الهويات الجغرافية كتير, الهويات المهنية كتير, كل الهويات متعددة, إلا الهوية الوطنية زي الفريك متقبلش شريك, فريدة وحيدة, مينفعش تتعدد فـ نفس البلد الواحد!
ودي هي المشكلة بتاعت دلوقتي الازدواج ف الهوية المصرية مع كلمة العربية الموجودة ف إسم مصر!
- قوة ووضوح الهوية بتظهر عن طريق رموزها الكتير, العلم والنشيد والعيد الوطني والملابس الوطنية والمنتجات الوطنية, وكمان الموسيقا والأغاني والرقصات والأكلات والمشروبات والزهور والفنون وحاجات كتير!
عشان ندعم الرموز الكتيرة دي, اخترت أركز مع أربع طلبات, شايفهم ضروريين ومستعجلين لدعم الهوية الوطنية المصرية:
- تدريس “علم المصريات” فـ كل مستويات مراحل التعليم, ودورات خاصة للمعلمين!
- أسامي المدن والشوارع, لازم تعبر عن رموز وشخصيات مصرية مش أجنبية!
- التقويم المصري, لازم الدولة تعتمده مع التقاويم التلاتة الحالية, وكمان تحتفل الحكومة بالسنة المصرية .. بعمل كده من سنة 1997, طلعت نتيجة للتقويم المصري بوزعها كل سنة, وبحتفل براس السنة المصرية مع زمايلي وجمعيات وعدد كبير من حراس الهوية المصرية اللي بيزيد عددهم سنة بعد سنة!
- عشان اللغة هيه بوابة الهوية, ووسيلتها للتواصل والمعرفة والتأثير والفهم والتعبير, بطلب الإعتراف بلغة الشعب (العامية), اللغوة المصري, أو “اللغة المصرية الحديثة”, بإعتبارها التطور الطبيعي لـ اللغة المصرية القديمة, والإعتراف ده يكون فـ صورة تخصيص أقسام فـ الكليات والمعاهد لدراستها, لأنها لغة كاملة, لها نحو وصرف وألفاظ وأصوات وعادات لغوية خاصة بها .. وهنا لازم أوضح بإن زي ما اللغة العربية الدستورية الحكومية, بتتدعم بـ مؤسسات تعليمية ومعاجم لغوية, بارضو لغة الواقع, لغوتنا المصرية, محتاجة إن الحكومة توافق وتأسس وترخص لمؤسسات تعليمية ومعاجم لغوية خاصة باللغوة المصري, اللي بيتقال عليها عامية!
الجمعه ١١ بشنس، ٦٢٦٤ مصري
موافق ١٩ مايو ٢٠٢٣ ميلادي