انتقد الإعلامي أحمد شوبير الحرب بين الأهلي و الزمالك على بعض الصفقات لمجرد دخول أحد الناديين بها دون النظر إلى الفائدة الفنية للاعب في النادي من عدمها ضاربًا مثال بصفقة الجزائري أحمد قندوسي.
وقال أحمد شوبير في تصريحات إذاعية اليوم الثلاثاء: «فيه صفقات بتروح تعملها كنادي الزمالك عشان الأهلي كان بيفكر في اللاعب ده أو الأهلي يعملها عشان الزمالك كان بيفكر في اللاعب، فأقوم أنا أجري أخطفه عشان أخط اللقطة عند الجمهور».
وأوضح أحمد شوبير: «أوضح مثال على الصفقات من النوع ده أحمد قندوسي اللي بعتبره واحد من أحسن اللاعبين في مصر، قندوسي كان الزمالك قريب جدا من ضمه، لكن الأهلي رح وخلص الصفقة وضم اللاعب بشكل نظيف وقانوني».
وتابع شوبير: «بعد كده لما قندوسي جه الأهلي منورش قوي وأنا رأيي الموسم الأول لا يتم الحكم من خلاله، وكان الرأي الفني لكولر إنه مش عايز قندوسي وكان رأى الأهلي عدم التفريط في اللاعب، فقرر يخرجه إعارة، فلعب مع سيراميكا وكسر الدنيا في مصر وحاليا سيراميكا أنهى كل شيء عشان يضم قندوسي نهائياً».
وأضاف شوبير: «فالنادي الأهلي أنت جريت وخدت قندوسي لكن ما استفدتش منه».
شوبير: الزمالك «اتعور» في عمر فرج عشان الأهلي كان عايزه
وضرب شوبير مثالا ثانياً مضيفاً: «كمان الزمالك جري جاب المهاجم الفلسطيني عمر فرج، وخده عشان مجرد إنه اتعرض على الأهلي وللعلم كولر كان رفض اللاعب من البداية، فأنت جبته يا زمالك ودفعت فلوس واتعورت فيه مش كثير يعني بس برضه فلوس، وفي الاخر مشي اعارة لأحد الأندية السويدية».
