انتقد الإعلامي أحمد شوبير حارس مرمى الأهلي ومنتخب مصر السابق، السويسري مارسيل كولر المدير الفني لفريق الكرة الأول بالنادي الأهلي بسبب تغييراته في مباراة الأهلي أمام باتشوكا فضلًا عن ترتيب اللاعبين في تسديد ركلات الترجيح.
وخسر الأهلي أمام باتشوكا في نصف نهائي كأس الإنتركونتيننتال بركلات الترجيح بعد مباراة كانت في المتناول.
وقال أحمد شوبير في تصريحات إذاعية: «الأهلي لعب مباراة جيدة جدا عشان نكون أمناء تماما وكولر أدار المباراة حتى الدقيقة 72 كأفضل ما يكون الأهلي ضاغط وطاهر مطلع كورة متطلعش وإمام شاط واحدة سهلة في أيد الحارس وأكثر من فرصة أضاعها الأهلي والشوط الأول سيطرة كاملة من الأهلي».
وتابع شوبير: «الشوط الثاني باتشوكا عمل تغييرين كويسين وبدأ شوية يرجع في المباراة بس ده 20 دقيقة فقط وبعد كده الأهلي سيطرة تامة على المباراة، اللاعيبة كلهم قدموا مباراة كويسة، تغيير حسين الشحات بأفشة كان كويس، إلى أن جاءت الدقيقة 78 خرج وسام أبوعلي ونزل محمود كهربا».
وأوضح: «نقف عند كهربا حاول واجتهد وعافر وكل حاجة لكن بيرسي تاو الحقيقة عمل له واحدة هو الحارس بلغة المهاجم سهلة جدا والناس الحقيقة استغربت هو وسام بيطلع ليه اه وسام مش في قمة فورمته لكن على الأقل رجيله في الملعب، لكن كهربا للأمانة مش في الحالة بتاعته».
وأضاف شوبير: «نيجي في ضربات الجزاء الأهلي اتقدم 3-1، وبعدين وأنا في الاستديو استغربنا إن كهربا داخل يشوط الركلة الرابعة طيب فين السولية وبيرسي تاو».
واختتم شوبير: «كهربا الدنيا معقربة معاه وطبيعي ما يشوطش إلا لو انت مش محتاجه عشان حالته في المباراة مش كويسة وحالته الشكل العام مش كويسة، وكان الطبيعي شاط كهربا وصدها الحارس بسهولة».
