سامى حرك يكتب عن النحس

نحس

النحس ثقافة شعبية
المناكفة والنقار, ثقافة شعبية, فلفل وشطة, توابل ثقافية يعني!
الحياة فيها كل حاجة, ومش مفروض نستبعد أي حاجة!
الحياة كده: فيها الحلو وفيها المر!
التنويع كاشف, والأصل الطيب يظهر ويبان فـ المصايب!
والتراث الشعبي, أو الثقافة الشعبية المتوارثة, أو بالبلدي: سلو بلدنا!
سلو بلدنا, من زمان أوي نقول إن رقم تلتاشر نحس!
– السبب إيه؟
السبب بإختصار, إن ده الرقم اللي مقدرتش إيزيس تكمله, يعني جتة أوزيريس اتقطعت أربعتاشر حتة, جمعت بس تلتاشر ووقف الرقم متحركش, وفيه مناشدة من ايزيس للرقم تلتاشر إنه يتحرك عشان تجمع جتة جوزها!
يبقا حكاية الرقم تلتاشر ده, من تراثنا الشعبي, وبقا من سلو بلدنا اننا نبعد عنه!
ويبقا من الواجب نحافظ ع السلو ده, ولو للنكتة والمناكفة والنقار الحلو, اللي شبه نقار الأهلوية والزملكاوية!
مش كل حاجة فـ التراث الشعبي نوزنها بالعقل, المزاج الشعبي له وزنة تانية!
عندكو –مثلن- حكاية بوس (تقبيل) الحجر الأسود, مش من الإسلام, ولا مفروضة, إنما من التراث الشعبي للعرب, والعرب حافظو عليها ودخلوها فـ الطقوس, وعلا قلبهم زاي العسل .. يبقا التراث الشعبي مش كله بالعقل!
نحس = تعويذة/ سحر (عمل)
بالمناسبة ودي حاجة ملهاش اي علاقة بالعنصرية, فـ كل فلكلور العالم حاجات فيها تشاؤم واحساس بالنحس من الغريب, يعني الأبيض يتشائم من الإسود, والأصفر, والأحمر, والعكس!
طب ده, له علاقة بإن كلمة “أسود” يقابلها فـ الهيروجليفي “نحسو/ نحسي”؟
و”نحس” تتصرف الحه مع حروف مخرجها تبقا “نعش” صندوق الدفن!
طب ده بارضو, له علاقة إن فيه ناس كتير بيتشاءمو لما يشوفو “نعش” أو حتا “جنازة”؟