فتح إبراهيم سعيد، نجم الأهلي السابق، النار على إمام عاشور، نجم الفريق الأول لكرة القدم بالنادي الأهلي، بعد المستوى الذي ظهر عليه في مباراة الاتحاد السكندري.
وانتهت مباراة الأهلي مع الاتحاد السكندري، بالتعادل الإيجابي بهدف لكل فريق في المباراة التي اقيمت بينهما مساء الجمعة، ضمن مباريات الجولة الثالثة من بطولة الدوري الممتاز
وقال إبراهيم سعيد، في تصريحات تلفزيونية عبر فضائية «النهار»،: «إمام عاشور مش عاجبني، ومش بحب اللعيب اللي يلعب ماتش أو ماتشين كويس وبعدين يريحله ماتشات تانية، ومشاطش غير كورة واحدة صحيحة على المهدي سليمان».
وأضاف: «الأهلي أعاد المهدي سليمان للحياة بعد الأداء المتميز اللي ظهر عليه، ده أنا كنت نسيته والله، لدرجة أنه كان مشي من سموحة ببلاش، ويستاهل أنه يبقى نجم عشان شال الاتحاد السكندري من كذا فرصة مؤكدة للتسجيل».
وأكمل: «إمام عاشور ابتدى أنه النجم الأوحد، وبيعمل حركات ملهاش لازمة وبلا هدف، شغل منظره وأنا من النوع اللي بحب اللعب الإيجابي زي حسين الشحات اللي عمل مباراة قوية».
وأشار إلى أنه مش لازم تعمل شو في الملعب، لازم تباصي وتلاعب الفريق وتبقى مؤثر وإيجابي، لازم يبقى في تركيز ودقة وتعرف أمته تشوط وترقص.
وبالحديث عن ضياعه لـ ركلة الجزاء، قال إبراهيم سعيد: «إمام عاشور حط قوة كبيرة أوي غير طبيعية في التسديد كان فيها نوع من المنظره بردو وعايز يجيب جول جمالي، ومن الممكن أن يكون المهدي سليمان عصبه، عشان كدة طلعت بالمنظر ده تقريبا عدت المدرجات وطلعت على طريق السويس».
ووجه نجم الأهلي السابق نصيحة لـ إمام عاشور: «لو حسست نفسك أنك النجم الأوحد، وقتك هيبقى قليل في الملعب، ياريت تبطل منظره والشو، وحاول تبعد عن الميديا عشان ممكن يكون الضغط النفسي اللي انت فيه من خارج الملعب من جوه الملعب».
