شن الإعلامي إبراهيم سعيد، هجومًا لاذعًا على محمود عبدالرازق شيكابالا قائد نادي الزمالك، بعد إهداره لركلة الترجيح في مباراة السوبر المصري أمام الأهلي، والتي ساهمت في تتويج الأحمر بالبطولة.
وحقق النادي الأهلي بطولة السوبر المصري للمرة الـ15 في تاريخه والرابعة على التوالي، بعد فوزه ليلة الخميس على نادي الزمالك بركلات الترجيح 7-6 بعد أن انتهى الوقت الأصلي والإضافي 0-0.
وقال إبراهيم سعيد في تصريحات تليفزيونية عبر شاشة «النهار»: «شيكابالا خلي عمر جابر يتحمل مسؤوليتك وشال خطأك، وهقولكم مفاجأة أن عمر جابر كان المفروض يشوط ركلة الترجيح الأخيرة مش شيكابالا».
وأضاف: «وكلام الناس أن في لعيب خاف يشوط، دي مبررات بسبب الخوف من شيكابالا، ده محمد السيد 18 سنة مخافش وشاط بقوة وشخصية».
وأكمل إبراهيم سعيد: «الغريبة أن اللعيبة القدامى بتخاف منه ومش بيرضوا يقولوا إنه غلطان، يا جماعة هو مش أحسن من النجوم اللي قبليه على سبيل المثال حازم إمام، شوف هو خسر كام واحد وضيع مجهود زمايله والجهاز الفني».
وأردف: «في فيديو منتشر على السوشيال ميديا، بيظهر أن بعد ما يوسف أيمن ضيع ركلة الترجيح، شيكابالا جري ولاعب تاني جري معاه بس مظهرش مين، وده بيقول إن مكنش دور شيكابالا، وكان مركز مع الجمهور، وتخيل الفرحة قبل مايشوط فـ تركيزه راح، وبالتالي الطبيعي تضيعها».
وأتم إبراهيم سعيد تصريحاته قائلًا: «شيكابالا شاطها بسهولة وبشكل سيء جدًا، والشناوي توقعها عشان شيكابالا مش مركز، وعمر جابر حطها حلو جدًا بس اتهز لحظة بسيطة وده اللي خلاها تطلع بالمنظر ده».
