كشف عصام الحضري، حارس مرمى الأهلي ومنتخب مصر السابق، عن وجود مشاكل داخل الفريق الأول لكرة القدم بالنادي الأهلي.
وقال عصام الحضري، في تصريحات تلفزيونية عبر فضائية «أون تايم سبورتس»: «ده مش النادي الأهلي اللي احنا متعودين عليه سواء من ناحية الأداء أو روح لاعبيه أو الترابط في الملعب أو الجهاز الفني».
وأضاف: «كولر، عنده مشكلة مفيش ثقة بينه وبين جمهور الأهلي على الرغم من تحقيقه 9 بطولات في موسمين، في لعيبة بتتدرب بجدية وعلى مستوى عالي، رغم كده مبيلعبوش، عشان كده في مشاكل، في لعيبة تانية عندها مشاكل ولكنها اتاخدت في كهربا، لأن مشكلة كهربا كانت واضحة».
وتابع: «الأهلي عنده مباراة صعبة أمام الزمالك، الروح والترابط بقت موجودة في نادي الزمالك ودي حاجة تحسب للعيبة ولشيكابالا، بصفته كابتن الفريق».
وأتم: «النادي الأهلي عنده مشكلة، لأن الأهلي يخسر بطولة يطلع كل القرارات دي يبقى في حاجة غلط، كان في لعيبة عايزة تمشي في بداية الموسم بعد تلقيها عروض احتراف والنادي موافقش يمشيهم، دي مشكلة كبيرة، مشوا محمد عبدالمنعم وديانج، اللي مكنش بيلعب».
ويلتقي الأهلي مع الزمالك، في الثامنة مساء اليوم الخميس، على استاد محمد بن زايد، في نهائي السوبر المصري للأندية الأبطال.
