كتبت:رينيه ميجر
كشف الفنان محمد الشرنوبي أنه يمر بنفس أزمة الفنانة شيرين عبدالوهاب بخصوص نشر أغانيه، بسبب قضايا ومشاكل مع المنتجة سارة الطباخ.
محمد الشرنوبي: بعاني من مشكلة شيرين عبدالوهاب
وقال «الشرنوبي»، في فيديو نشره عبر حسابه الرسمي بموقع «إنستجرام»: «بخصوص موضوع شيرين أنا مش فارق معايا أي حاجة غير إني سمعت صوت شيرين، وإن إحنا جمهورك مستمتعين بالأغاني الجديدة، ويا رب المشكلة بينك وبين روتانا تخلص في أسرع وقت علشان الأغاني تنزل بشكل طبيعي».
وأضاف: «أنا بقالي 5 سنين في قضايا ومشاكل مع سارة الطباخ أو الشركة اللي كنت ماضي معاها، وفي 24 مايو 2022 طلع حكم بانتهاء عقدي وطلعت الشركة قالت العقد لم ينتهي، وقعدنا شوية لحد ما طلع 3 أحكام تؤكد إن العقد انتهى وإني معنديش أي التزامات بأي شركة إنتاج، وبدأت أشتغل مع واحدة من أهم الشركات في الوطن العربي».
وتابع: «المشكلة اللي بتواجهنا إن الأغاني بتفضل موجودة على كل المنصات لأن موقفنا سليم، لكن في ثغرة في قانون يوتيوب مش عارفين نتعامل معاها، ثغرة معمولة علشان تحمي حقوق الناس، وهي حاجة اسمها سترايك لو حد عملها يوتيوب بيحذف الأغنية، ويدي مهلة 10 أيام لصاحب الـ «سترايك» يرفع قضية، ولو رفعها الأغنية يتم حذفها لحين حل القضية في المحاكم، وده ممكن ياخد من 8 إلى 10 شهور».
واستكمل: «هي استغلت الثغرة دي أول مرة في أغنية قلبي ارتاح، وأنا كسبت القضية والأغنية رجعت، وكررت استغلال الثغرة في كذا أغنية وآخرها أغنية استغنيت والقضية مستمرة».
واختتم: «مش عارف آخرة اللي بيحصل ده إيه، أنا مكمل وهنزل أغنية يوم الأربع، ومش هسكت عن حقي، ومش هسيب حد يتعدى على حقوقي إني أغني وأسمعكم المزيكا اللي بعملها. أنا عامل تقريبا 30 أغنية، وشايل الحاجات الحلوة مش عايز أحرقها».
