متابعات رفيق عماد
تستعد الفنانة شيرين عبد الوهاب لطرح أغنيتين جديدتين، بعد أزمتها الأخيرة مع طليقها الفنان حسام حبيب، وإعلانها التعاقد مع شركة إنتاج جديدة عبر تصريحات صحفية.
الأغنية الأولى للفنانة شيرين عبد الوهاب تحمل اسم «بتمنى أنساك» من كلمات وألحان عزيز الشافعي وتوزيع توما.
والأغنية الثانية بعنوان «يقابل حبيبي»، من كلمات تامر حسين وتوزيع توما، والمقرر طرحهما قريبًا لتعود للساحة الفنية.
أثارت الفنانة شيرين عبد الوهاب وطليقها الفنان حسام حبيب ضجة واسعة وجدلًا كبيرًا خلال الساعات الماضية، حيث توجهت الفنانة باتهامات له وحرص الأخير على الرد.
رد حسام حبيب على اتهامات شيرين عبد الوهاب
رد حسام حبيب على اتهامات شيرين عبد الوهاب عبر تصريحات تلفزيونية، قائلًا: «طبعًا أنا خجلان من كل اللي بيحصل، ومش عارف أقول إيه عن اللي بيحصل، بس والله العظيم أنا بريء من اللي بيحصل».
وتابع: «ممكن يكون ده حصل عشان خاطر هي بتحاول تتصل بيا بقالها يومين تلاتة وأنا مبردش عليها، الورقة اللي شيرين بتقول بيها أنها حولت ليا مبلغ مالي، مكتوب فيها غرض التحويل لزوج، فأول حاجة كدا هو أنا زوجها!!، ثانيًا حتى لو كنت الزوج وهي بتدلعني بالمبلغ دا إزاي تخرج تقول أني عايز أموتها».
واستكمل حسام حبيب رده: «يا هي بتكدب لما قالت إننا اطلقنا يا هى بتكدب على البنك وقالت إني زوجها وحولتلي، شيرين عبد الوهاب دمها بقا تقيل والمرة دي بجد هحبسها».
وقال أيضًا: «هي خرجت النهاردة وقالت الكلام دا لأنها عمالة تتصل بيا لحد إمبارح بليل عشان نرجع لبعض، وأنا مبردش عليها، عشان انا رافض نرجع تاني بعد كل اللي حصل آخر مرة لما الأمر وصل للنيابة والحوار كبر، وفي الآخر عشان أنا زهقت عملتلها بلوك، الموضوع مش بالعافية أنا مش عايز أرجع، وأنا اللي في سجن وعايز أتحرر منه، أنا اللي تعبت وأستحملت إهانات بقالي سنين على حاجات محصلتش».
واستكمل حسام حبيب في رده على اتهامات شيرين عبد الوهاب: «وعمري ما اشتكيت ولا اتكلمت ولا دافعت عن نفسي عشان ميطلعش شكلها وحش، بس خلاص كدا أنا فاض بيا، وكل حاجة هتتقال للناس زي ما حصلت بظبط، أنا عمري ما طلعت أسرار حد برا ولا عمري ما كنت هعمل كدا، بس خلاص أنا أضطريت لكدا، الحياة مش بالعافية أنا مش عايز أرجعلها».
وأضاف: «أنا اللي بستنجد بالناس وبقولهم نجمتكم الكبيرة اللي بتحبوها من سنين كتيرة، عايز أبعد عنها ومش عارف، أتصرف إزاي واستنجد بمين، وأنا بدعي ربنا قدامكم أهو يارب عايز أبعد عنها يارب ومش عارف اعمل إيه، أنا تعبت بجد وسنين من الظلم والإهانة وبسكت ومبردش، وكل الكلام اللي كانت بتقوله غلط كله، هو في حد يكون ضارب حد وفتحله دماغه، ويعتذرله عادي، وقبلها كنت حالق شعرها وتعتذرلي عادي، ويرجعله تاني».
وقال أيضًا: «بتقول عشان بهددها!! بهددها بإيه دا اللي هي قالته للناس أقوي من أي تهديد، إيه اللي عندي أهدده به، وأقول ربنا كبير لحد ما أظبط ورقي وأكلم المحامين بتوعي عشان أعرف أخد حقي ومش هتنازل المرة دي خالص، وهاخد حقي بالقانون لأني عملت حساب للعشرة أكتر من مرة، وكل مرة بيطلع أكتر من اللي قبله، أيام مكالمة لميس الحديدي وطلعت قالت شتائم وحاجات في حقي».
وعلى على اتهامات السرقة، قائلًا: «أنا عايز أعرف إزاي سرقتها، هل دخلت وأنا لابس طاقية الإخفاء، ومحدش شافني، وكل مرة سرقة وكلام أقل بكتير من إني أعلق عليه، كل شوية أنا سرقت وعملت، وأنا بسنتجد بكل الناس أرحموني منها، دا ذنب أنا عملته في حياتي أنا مش عارف إيه دا، ولسة هطلع أتكلم كمان بكل التفاصيل ومش بقول كدا عشان خاطر أخوفها، لا دا حقي، عشان كل شوية يتقال كلام عني وعن أهلي».
واختتم حسام حبيب: «وأنا مش بشكر في نفسي الحمدلله متربي ومن عيلة كويسة جدًا، ومتربي في أماكن كويسة ومتعلم في مدارس كويسة جدًا، وبعرف ربنا سبحانه وتعالى وعايز أقول للناس كلها شيرين عبد الوهاب بتستقوى بيكم، ودائمًا بتهددني عشان لو معملتش حاجة، تقولي مش هخليكم تمشي في الشارع، فأرجوكم بالله عليكم بلاش تمشوا مع حد عايز أظلم حد».
وكانت قد استغاثت شيرين عبد الوهاب بالجمهور من حسام حبيب، موضحة أنه يسعى لتدميرها نفسيًا وجسديًا، واتهمته بالسرقة.
