1- الفيلم فيه قصة وقصة حلوة كمان ، عن إبراهيم الروبي وزوجته إيمان الروبي زوجين عايشين بعيد عن زحمة القاهرة والسوشيال ميديا لسنين طويلة ، وبيفضلوا كدة لحد ما بيزورهم إيهاب الروبي اللي بيطلب من أخوه إنه ينزل معاه القاهرة يخلصوا شوية ورق عشان يقدر يشتغل في الكوافير بتاعه.. ومن هنا بيبدأ الفيلم
2- الفيلم مش كوميدي زي ما اتروج ليه ، بس في نفس الوقت مش تقيل زي ما التريلر صدّر الشعور ده لناس كتير .. الفيلم لايت وهيفضل محافظ على ابتسامتك من أول مشهد لغاية النهاية وهتضحك في شوية مشاهد
3- للمفاجأة الفيلم فيه جانب جد معمول حلو ، وفيه رسالة عاوز يقولها رايحة ناحية السوشيال ميديا واللي عملته فينا من ساعة ما انتشرت ، وتقريبًا دي أحلى حاجة شوفتها بتناقش الموضوع بطريقة خفيفة من غير إسفاف وجد من غير أفورة
4- كريم وكريم أحلى حاجة في الفيلم ، فيه تناغم رهيب بينهم يحسسك إنهم اخوات فعلا .. لو هنتكلم عن كريم عبد العزيز فـ بيت الروبي أحلى من أفلامه الكوميدية الأخيرة سواء البعض لا يذهب للمأذون مرتين أو نادي الرجال السري “رغم إن كاست الاتنين اتقل”
الأعمال الجد مأثرتش على تلقائيته وروحه الحلوة ، والنقلات والتحولات الجدية اللي في دوره عملها حلو أوي
كريم محمود عبد العزيز أكتر حد ضحكني في الفيلم وطول مانت بتتفرج هتحس إنك شايف نسخة مصغرة من محمود عبد العزيز ، حقيقي مبسوط بيه وبوجوده في بطولة مع كريم عبد العزيز لأن ده المكان اللي يستحقه .. بشكل عام مشاهد الكريمين مريحة ومنعشة للي هيشوف الفيلم
5- الفيلم عائلي من الدرجة الأولى .. أهلي مش بيحبوا السينما أوي ومش بيفضلوا أجوائها بس بمجرد ما الفيلم بدأ اندمجوا معاه ولاحظت إنهم كانوا مبسوطين أكتر مني ، وكانوا متفاعلين جدًا مع الفيلم وخارجين بنتكلم عن مشاهد عجبتنا .. فـ الفيلم – باستثناء جملتين – مناسب اوي للمشاهدة العائلية
للأسباب دي شوف بيت الروبي في السينما ، وفيلم زي ده متدخلوش لوحدك .. انت تجمع عيلتك وتبقوا فريق واحد زي عيلة الروبي “اللي اتفرج هيفهم” 😂❤️
