رقص مصر

فاكرين من كام شهر لما السوبرانو المصرية فاطمة سعيد
مسكت العصاية ورقصت رقص مصري أصيل وهي بتغني أوبرا اتهاجمت بضراوة من الناس وتحديدًا كانوا بيقولوا حاجتين حرام وقلة أدب وأهانت اسم مصر بالخلاعه دي و عيب وميصحش إنها ترقص الرقص البلدي البيئة ده في فن راقي زي الأوبرا
والحقيقة فاطمة سعيد نفسها لما اتسألت بعدها عن الموضوع
قالت إن الأوبرا هي فن متكامل.. فيه غنا وتمثيل ورقص
وإن كل بلد بتضيف عليه هويتها القومية المميزة..
فالأوبرا الإسباني بيرقصوا فلامنجو و الأوبرا الارجنتيني بيرقصوا تانجو من غير ما حد يقولهم عيب ولا إسفاف
وهي حبت إنها تضيف هوية بلدها في الأوبرا
وترقص الرقص المصري و في الحقيقة الانتقادات واللي قالته فاطمة سعيد ده بيكشف
أزمة هوية مصر المعاصرة..ما بين هجمات شرقية بدوية
بتوهمنا إن كل حاجة في ثقافتنا دي عيب وحرام
وهما بس اللي صح واحنا يع ووحشين
ومابين تصورات غربية استعلائية أقنعتنا إن كل فنوننا مش راقية ومش كفاية زي فنونهم..
فيبقى الأوبرا فن راقي والموال الشعبي فن حقير..
أو رقص الباليه راقي بس الرقص المصري كخة وقلة ادب
وطبعا المصري غرقان ثقافيًا ما بين نظرة البدوي الحاقِد
والغربي المتعالي.. وشايف إن ثقافته مش حلوة كفاية أو مش راقية كفاية وإنها عيب وحرام ومغضوب عليها…
إنسحاق ودونية غير طبيعية عند بعض المصريين
بين مفرمة النظرة الدينية الرجعية والنظرة الحداثية الإستعلائية والحقيقة إنه الثقافة المصرية على العكس تمامًا..
بل إن الغرب نفسهم انبهروا لما شافوا فريدة مظهر
بترقص مصري في امريكا لأول مرة
والموضوع أثر فيهم ثقافيا جدا وسموها Little Egypt
واتعمل عنها أفلام وأغاني والبنات الأمريكية حاولوا يقلدوها..
و على الناحية التانية الشرق انبهر بالرقص المصري
وبسرعة الرقص المصري انتشر
للحضارات المجاورة في الشام والعراق
وحتى أرمينيا وروسيا
وبقينا نشوف رقاصات زي جوهرة وصافينار بل ولورديانا البرازيلية!!
وفي ظل تغييب الشعب المصري ونسيانه هويته..
قفز الشرق على الرقص المصري
وسماه “الرقص الشرقي” في سرقة واضحة للتراث المصري..
حيث إن الرقص الشعبي لكل البلاد معروف
مثلا الدبكة في الشام
والرقص العربي بالسيوف والحركات الإيقاعية..
على عكس الرقص المصري القايم على تمايل الجسم الانثوي في رشاقة
والمرسوم بدقة على جدران المعابد المصرية من آلاف السنين
وبردو على الناحية التانية قفز الغرب على الرقص المصري
وسماه Belly dance ومعناه “رقص الخصر”
في محاولة لجعله تراث عالمي وكأن كل البلاد مشتركة فيه…
أتمنى الشعب المصري يفوق ويبدأ يوعى لنفسه ولهويته
ويتوقف عن النظر بازدراء للراقصات المصريات المحترمات..
لأنهم فنانات مش عاه‍رات…
وياريت بعض اهل الفن نفسهم يفوقوا من احتقار نفسهم
والاحساس بأنه بيعمل حاجة عيب ولاحرام
الفن موهبة ربنا اختص بيها البعض مش الكل وميزهم عنهم
الحرام هو استغلال الموهبة فى جميع المجالات مش الفنون بس
فى اى شىء مخالف للقانون ومقاصد الاديان
اتمنى نتخلص من قيود الشرق والغرب ونفخر بهويتنا الأصلية
ونسترد فنوننا الشعبية ونقول للعالم كله إن مصر مصرية