كل لما يعجبني مسلسل قديم ادور علي مين اللي كاتبه يطلع الكاتب الكبير أسامة انور عكاشة
الحقيقة انه الكاتب أسامة انور عكاشة واحد من اعظم المؤلفين اللي جات في تاريخ التليفزيون المصري …اجيال كتير ذكرياتها اتكتبت بإيد الراجل ده بسبب مسلسلاته اللي كانت بتلم العيلة قدام التلفزيون
دايما اعماله بتمس مشاكلنا سواء عن طريق سرد المشكلة او حتى محاولة حلها لانك مع كل مسلسل عمله هتلاقيه بيرصد تغيرات الشارع المصري، ازمة الهوية ،سيطرة الرأسمالية، تغيير الذوق العام ، التاريخ المصري واللي هتلاحظه واضح اوي في مسلسلاته اللي دايما مليانة بشوارع الحسين والخان والسيدة والجمالية وحاضرة تقريبا في كل اعماله عشان تزيدها جمال فوق جمالها
الحقيقة بمجرد رؤية اسمه على التتر ده لوحده كفيل انه يعرفك انك هتشوف حاجة ليها قيمة وفكرة ومعني..هتسمع حوار راقي ومحترم يليق بيك ويقنعك كمشاهد راقي و زواق.. جملة او موضوع هيضيف لك او حتى يستحوذ علي عقلك ويشغل تفكيرك علي مدار التلاتين حلقة
والمميز في اعماله ان كل الشخصيات في اعماله ابطال (سليم البدري ، سليمان غانم ، فضة المعداوي ،حافظ رضوان، حسن ارابيسك، ابو العلا البشري ) وغيرهم كتير ومش بس الابطال حتي الأدوار الثانوية مش بتمر عليه مرور الكرام بل بالعكس بتاخد حقها فالكتابة زيها زي الابطال..كل شخصية في اعماله ليها خط درامي مليان تفاصيل وتحولات و صراعات وتطورات كتير لدرجة انه ممكن الشخصية الواحدة منهم يتعمل بيها مسلسل ليها لوحدها عشان كدا تلاقي كل شخصية من شخصياته اسمها بحكايتها بتفاصيلها معلمة معانا لحد دلوقتي و لا يمكن تتنسي
تحية للعبقري المصري أسامة أنور عكاشة ❤
