فى عزاء عمنا جورج اسحاق .. وقف سياسي بارز مسلم اسمه صلاح عدلي جنب اسرته ياخد العزاء معاهم .. وبعده اصطف مجموعة مسلمين يساريين ياخدوا العزاء واصبحوا هنا اسرة عم جورج، الصف كان طويل… وانا بسلم على الناس افتكرت كلام عم جورج لما كان واقف بيضحك معايا فى نقابة الصحفيين، وقال لى هو انت لما رشحت عمر سليمان بقيت من الفلول ولا ما زالت من ثوار الميدان .. وضحك .. قلت له يا عم جورج انا عملت حملة ترشيح عمر سليمان كان اسمها الجبهه الثورية لترشيح عمر سليمان .. قال لى بالنص على فكرة انا بحب عمر سليمان لانه وطنى جدا واقولك على سر ( رغم رفضه لطريقنا لكنه هو وزملائه كان فاهمين كويس اننا وطنيين وبنحب البلد)، خلصت السلامات وانا نازل على السلام ، افتكرت لما كنت فى فندق سونيتا وكان اللواء مراد موافي معزوم فى احتفال وحاضره عمنا جورج اسحاق ، ولقيته لما دخل اخد مراد موافي بالحضن وقاله واحشنى يا سيادة اللواء… وبعدها اما سألت عم جورج تعرف الجنرال منين.. ابتسم ومرضيش يحكى لى ، واكتفي بجملة واحدة ” هو حبيبك اسأله ” نزلت السلام بتاعت الكاتدرائية .. وكانت الاديبة الكبيرة بهيجة حسين واقفه بتبكى بحرارة ولكنها اصرت تسلم على وتعزينى والحقيقه هى اللي تستاهل اعزيها.
جورج اسحاق رمز وطنى وكان حبيب الكل .. كان ضد الفساد والفاسدين .. لكن شوفت بنفسي علاقاته بالدواير الكبيرة، وعمره ما كان ضد مؤسسات بلده. والرئيس السيسي كرمه مرتين بالتعيين فى المجلس القومى لحقوق الانسان، وجدد له مرة تانيه.
الله يرحمك يا عم جورج .. تعالوا بكرا نكرمه ونرد له جمايله علينا كلنا ونحضر العزاء.
بكرا العزاء من الساعه٣ عصرا لحد الساعه ١٠ مساء عزاء جورج اسحاق فى كنيسة العذراء بشارع المرعشلي بالزمالك.
تنزل محطة مترو الزمالك وتتمشي لشارع المرعشلي .. الكنيسة معروفة جدا والعنوان سهل.
